Vinnu við áfanga 15 er lokið. Fjarskiptafélögin hafa móttekið lista yfir þau heimili sem tilheyra áfanga 15 og niðurstöður mælinga fyrir áfangann. Þar með er ekkert því til fyrirstöðu fyrir íbúa sem tilheyra áfanga 15 að panta sér fjarskiptaþjónustu.
Til upprifjunar þá afmarkast áfangi 15 af Grímsstöðum í vestur, Svignaskarð, Borgir og Hlöðutún afmarka áfangann í norður. Galtarholt og Sólheimatunga tilheyra áfanganum auk þess sem heimili á milli Tómasarhaga og Melkots eru nú tengd.
Rétt er að minn á mikilvægi þess að hafa LL númerið sem stendur á inntaksboxi ljósleiðarans við hendina þegar pöntuð er fjarskiptaþjónusta. Þetta er einkenni ykkar tengingar og tryggir að þið pantið nú örugglega tengingu á réttan stað. Númerið er á þessu formi: LLxxx.Txx.xx. Gæti til dæmis verið LL115.T17.01.
Áfram er unnið við frágang í áfanga 14. Sá áfangi liggur suður af áfanga 15 frá Galtarholti að Borgarnesi, að Ferjukoti og Ferjubakka auk þess sem að Laxholt, Stangarholt og Jarðlangsstaðir tilheyra áfanga 14. Jarðvinna er langt komin í áfanganum og senn líður að því að strengjum verði blásið í rör og ljósleiðari tengdur í tengibrunnum og á heimilum.
Næsti áfangi á dagskrá er áfangi 13 þ.e. í vestur af Borgarnesi að Rauðanesi, Langárfossi, Valshömrum og Háhóli svo nokkur heimili séu nefnd sem tilheyra áfanga 13.
